علاوي وصبري أفندي
تحت موس الأيام .. حلقات فكاهية يتعانق فيها القلم مع الريشة ليقدما لكم مشاهد كوميدية ممتعة، مستوحاة من مسلسل تحت موس الحلاق الذي أسر العراقيين لأجيال لنكهته الشعبية العفوية، والطريفة، والمميزة، التي قدمها عمالقة الفن العراقي سليم البصري، حمودي الحارثي، خليل الرفاعي، راسم الجميلي، وآخرون، تقدمها لكم ، فكرةً، وكتابةً، ورسماً، الفنانة المبدعة إيمان البستاني،التي تصف هذا العمل بقولها ( أنه محاولة لربط الحاضر عبر تنقلاته بمفردات مرت على الذاكرة، حزينة كانت أم سعيدة، أأمل أن ينال رضاكم، وإن أي تشابه بين حوادث وشخصيات المسلسل محض صدفة وليس الغرض منه الإساءة لأي شخص وإنما لغرض الفكاهة البريئة )، فيما رسم الشخصية الكاريكاتيرية لبطل الحلقات (علاوي) الفنان المتألق جبار الجنابي.
تحت موس الأيام .. كوميديا باللهجة العراقية، تقدم لكم معلومات عن شخصيات وأحداث وأماكن من العراق بنكهة التراث، وهو عمل جديد بفكرته وأسلوبه، في إطار ( الأدب الشعبي ) فتابعوه .
مشرقيات
فكرة وكتابة ورسم
إيمان البستاني
الحلقة الخامس عشرة
كويظم : عمي .. عمي سيد رجب .. هذا سيد شاكر أبو الدكان يريدك .. يكول خلي يجي يكعد يمي بالدكان شوية ليش كاعد وحده
سيد رجب : إي ابني رايح .. جيب جايات وتعال وراية للدكان .. لا دزها بيد علاوي أحسن .. أنت لاتعوف الكهوة .. ولو ظهرية ماكو أحد .. عينك على الدخل وليدي
سيد شاكر : هلا ومية هلا بسيد رجب .. أي دتعال نكعد شوية .. ليش كاعد وحدك صار ساعة أباوع عليك .. آني ما أكدر أعوف الدكان وأنت ماشاء الله عندك كويظم وعلاوي بمكانك
سيد رجب : لاتعّول على علاوي وتحسبه زلمة بروح أبوك .. كويظم أي لازم ظهري .. بس هذا أبو البلاوي .. شلع كًلبي سيد .. يومية مسويلة مكسورة
سيد شاكر : يالله سيد رجب .. أنت تموت على السوالف والضحك وبعدين هو وليد يتيم يصيبك أجر من وراه وحجة لبيت الله وأنت كاعد هنا
سيد رجب : وصيت يجيب جايات .. هياته أجى بالصينية .. دشوف بالله عليك سيد شلابس هية هاي دشداشة ماتغطي ركبته .. سينما هالولد
علاوي : هذا الجاي .. عمي تريد أعلي صوت القوانة حتى يوصلكم
سيد رجب : أي ابني هيه نفسها لاتبدلها .. آني حاط من الصبح قوانة صبري أفندي مال صديقة الملاية .. روح علي الصوت ولاتكعد هنا بالدكان .. إذا مديت أيدك على شكرات عمك ماتلوم إلا حالك
سيد شاكر : دعوفة شتريد منه سيد .. صدك جذب .. هسة هية الشكرات للجهال أول وتالي .. أخذ عمو مد أيدك لاتخاف
سيد رجب : بروح أبوك سيد لاتنطيه وجه .. ترا يكوم يلوّص ويخيط ويخربط .. النوب دكان ومليانة شيش حامض حلو .. عمي لو جاي أنت كاعد يمي مو أحسن وأستر
سيد شاكر : ماكو فرق سيد .. شعندك اليوم ويا صبري أفندي .. شوف هسة يلا سمعتها .. والله طرب أصيل .. الف رحمة على روحهم جميعا
علاوي : أريد دوندرمة أم الطابوكة عمي
سيد رجب : عمي إنطيه الطابوكة وسجلها عليه هذا ولاتخلص مطاليبه .. شلون سيد سألتني على صبري أفندي وعلاوي كطع سالفتنا بطابوكته .. عندي كل قواناتها وأغانيها سيد
سيد شاكر : شوف سيد .. علاوي حط الدوندرمة بكرصة الخبز .. ليش ابني هاي ياكلوها بلا خبز .. أي سيد هية صديقة الملاية جانت صدك كوكب العراق .. أتذكر أول ماغنت بملهى الشورجة وياها صالح الكويتي هو جان يلحن أغانيها
سيد رجب : أي هذا المسكين لحن كل أغاني أيام زمان لسليمة باشا ولزكية والمنيرة وهو لاكويتي ولاهم يحزنون .. الرجال من الزبير شال عوده وأجى لبغداد ونزل بفندق الهلال بالميدان وبقى يلحنهم كلهم أيدة ذهب .. ومن ماتت صديقة الملاية سنتين مالزم عود وغطاه بالأسود وكيلك الله .. وفا
سيد شاكر : وليدي علاوي .. لاتمد أيدك .. أنت كول شتريد .. وآني عمك أنطيك
علاوي : عمي شنو هذا المصفط فوك
سيد شاكر : ابني هاي مشوطة خشب .. شتسوي بيها أخذ مصقول أحسن
سيد رجب : ولك مضروب الجلوة .. مو اتزقنبت الطابوكة كوم روح للكهوة .. لاتبقى كل شوية هذا شنو وذيج شنو
سيد شاكر : أي سيد على سالفة صالح الكويتي .. جان هو يلحنها .. واللي يدكون يطلعون عشرين وحد خطية كلهم عميان واحد يلزم جاكيت اللاخ من يفوتون الملهى ويبقون يدكون لتالي الليل تاليها تجي سيارة شوفرليت تاخذهم لهاي الجمعية مال العميان هناك أكلهم ونومتهم
سيد رجب : أي جان حتى عدها حرس يحرسوها .. وجانت الله يرحمها تلبس ذهب هواية من تفوت للملهى تغني .. وتالي ماتت تكدي بباب الإذاعة .. مرة وهية دتطب الملهى وجان يهجمون عليها حرامية يريدون يبوكون ذهبها .. كالت للحراس محد يلزمهم ..عوفوهم .. وإنطتهم شغل براتب بنفس الملهى
سيد شاكر : أي المسكينة أحلى من غنى صبري أفندي .. هو جان صندوق أميني بالبصرة وأصل الأغنية كلها قصة وداعتك سيد حقيقية .. جان أكو مغنية حلبية إسمها حياة بالبصرة وكت أيام الوالي الدروبي .. حبها مات عليها .. هية ولادارت بال .. شلون ينتقم منها .. أخذ ابنها للعسكرية وهو جاهل زغير حتى مو مال عسكرية وهالواحد لأمه .. سمع صبري أفندي ماقبل وتدري العراقي أبو غيرة كام ودفع البدل النقدي ورجّع الوليد لأمه .. كامت هية غنت هالأغنية ويكولون عشقته من جماله وأخلاقه بس هو عفيف نفس .. وغنوها الأغنية هواية وراها حسينة وغيرها .. تالي غنتها صديقة ولعلعت بغناها
سيد رجب : هية المسكينة صديقة الملاية هذا مو إسمها الحقيقي .. أبوها مات وأمها إتزوجت .. وأتبهدلت وشافت ظيم وقهر .. وإنهزمت وغيرت إسمها من فرجة عباس إلى صديقة صالح موسى حتى أهلها مايدورون وراها .. تدري غنى وملهى محد يقبلها .. بدت تقرأ قرايات بالفواتح وراها كامت تغني وسجلت أغانيها بالإذاعة .. حتى سافرت لبيروت تغني
سيد شاكر : علاوي وليدي عوف الدخل .. ترا وعمك كلها خلالات العبد
سيد رجب : ولك هاي بعدك هنا .. تكول جريدي ولاشفته .. كاعد تنبش بغراض هالمسكين شنو .. إمشي يلا كدامي للكهوة .. أكول سيد هية إتزوجت
سيد شاكر : يكولون إتزوجت بالسر جمول من محلة باب الشيخ .. حبها ومات عليها .. يومية يكعد كبالها بالملهى من تغني ويطك أصبع وجان يغار عليها هواية خصوصا من رشيد القندرجي .. حتى هدد صاحب الملهى وكال أنطيك شكد تريد فلوس بس هذا القندرجي مايطب الملهى .. وهو كلها الرجال يعلمها مقام مابينهم شئ
سيد رجب : هية إلها أغنية من سمعت بالسعدون إنتحر غنتها عليه بس إنفقدت الأغنية ليش محد يدري ..وغنت ياعسكر السلطان بالبر يخيمون على معركة الشعيبة
سيد شاكر : تمام حجيك سيد وغنت ماتنفع الحسرات رحنه من إيديهم على ضيعة البصرة من العثمانيين .. تاريخ طويل عريض .. شوف شلون أخذ الوكت مو أحسن من كعدتك وحدك سيد .. وليدي عوف الفانوس عالرف ترا عمك أعمى بلا هالفانوس .. عوفة وليدي .. لا ..لا يمعود .. يلا فدوة
سيد رجب : ولك ليش .. ليش هالأذية .. ليش كسرت فانوس الرجال .. سيد بروح أبوك لو تكول شكد فلوسه لو هسة أدزلك بمكانه واحد من الكهوة .. أيا أغبر على هالدكة
سيد شاكر : لا والله مايصير ..العوض حرام .. يالله راح الشر .. ماصار شي يسوى أتوكل بالله سيد رجب
سيد رجب : إمشي مسود الوجه .. شلون طلّعت كعدتنا سم .. تكول لاشايف شكرات ..لا طاب بدكان ..لاشايف فانوس .. مو يومية شايلة وتارسه نفط ماشبعت منه.. صدك غثة .. وأذية .. إمشي صعد عندي السكر
كويظم : هلا عمي .. أجيبلك طاسة ماي بارد
سيد رجب : أي وليدي ..هذا نشف ريكَي
علاوي : عمي .. اريد أروح لأمي أسالها بلكت تعرف تغني ويعفوني من الجندية
سيد رجب : هية أمك المسكينة مال غنى .. كل اللي تعرفه يمكن دللولي ياأبني .. عدوك ساكن الجول
علاوي : ساكن الجول .. لا هواية إتسرحنا .. لو خالقني إبن حياة المغنية موأاحسن .. صدك حظوظ
سيد رجب : نام رغد أصلا أنت سلاح سز بلا أغاني .. هذا يا جيش مخبل يرضى بسوالفك
...
caricature@asc-corp.org
