علاوي وحسون الأمريكي
تحت موس الأيام .. حلقات فكاهية يتعانق فيها القلم مع الريشة ليقدما لكم مشاهد كوميدية ممتعة، مستوحاة من مسلسل تحت موس الحلاق الذي أسر العراقيين لأجيال لنكهته الشعبية العفوية، والطريفة، والمميزة، التي قدمها عمالقة الفن العراقي سليم البصري، حمودي الحارثي، خليل الرفاعي، راسم الجميلي، وآخرون، تقدمها لكم ، فكرةً، وكتابةً، ورسماً، الفنانة المبدعة إيمان البستاني،التي تصف هذا العمل بقولها ( أنه محاولة لربط الحاضر عبر تنقلاته بمفردات مرت على الذاكرة، حزينة كانت أم سعيدة، أأمل أن ينال رضاكم، وإن أي تشابه بين حوادث وشخصيات المسلسل محض صدفة وليس الغرض منه الإساءة لأي شخص وإنما لغرض الفكاهة البريئة )، فيما رسم الشخصية الكاريكاتيرية لبطل الحلقات (علاوي) الفنان المتألق جبار الجنابي.
تحت موس الأيام .. كوميديا باللهجة العراقية، تقدم لكم معلومات عن شخصيات وأحداث وأماكن من العراق بنكهة التراث، وهو عمل جديد بفكرته وأسلوبه، في إطار ( الأدب الشعبي ) فتابعوه .
مشرقيات
فكرة وكتابة ورسم
إيمان البستاني
الحلقة الرابع عشرة
سيد رجب : علاوي ..علاوي ألحك .. صيحلي سيد نعمان .. فات من كدام الكهوة .. ولا سلم .. روح كوله سيد رجب يريدك
سيد نعمان : خير سيد .. شلونك شلون أحوالك .. جنت فايت من هنا لدكان سيد شاكر وكلت برجعتي أجي أكعد يمك
سيد رجب : مو آني هماتين أكول شعجب سيد نعمان فات وماسلم .. داكعد إستريح .. وليدي كويظم فد حامض لعمك سيد نعمان ..علاوي .. تعال هنا وليدي إمسح كدام عمك كله دبك جايات
علاوي : صار عمي .. آني هماتين أريد أشرب حامض أيصير لو لاع
سيد رجب : ليش مايصير وليدي .. والله سيد نعمان ولا أكدر أكوله لا.. لهل منبوش الصفحة
سيد نعمان : كَلبك رجيج سيد رجب .. وداعتك كلها حسنات .. أي سيد شكو ماكو أخبار .. كولي بروح أبوك ماتطلع من الكهوة فد يوم .. شو طول الوكت كاعد هنا ماتضوج
سيد رجب : بلي سيد.. الجمعة الفاتت كضيتها ورا الصلاة بشارع السعدون وشلون منظر شفت فاتك سيد نعمان .. شفت حسون الأمريكي شمسوي بروحه راكب ماطور .. ولابس بنطرون كصير مزركش زرق ورق .. وحاط شفقه على راسه .. وجواريب مقلمة .. يعني شارع السعدون كله بقى يباوع عليه
سيد نعمان : يمعود هذا مسكين .. هو واهسه بالهدوم العجيبة غريبة .. يلبسها ويخترع شيلبس .. بس كلها سيد ماركات زينة وغالية .. ما أيأذي أحد
سيد رجب : لا شيأذي خطية .. هو من شغلته بالمستشفى المجيدي ممرض بمصرف الدم يوصي الأطباء يدزوله هدوم من بره من فلوسه الرجال قابل هو عالة على أحد
علاوي : هاي على منو دتحجون عمي ..هذا الرجال عراقي لو أمريكي
سيد نعمان : لا وليدي هو عراقي .. أمريكي شنو .. بس هو غاوي يلبس مثلهم لبس مال بره .. وبعدين من أحد يسلم عليه يجاوبه كود مورننك .. كامت العالم سمته حسون الأمريكي
سيد رجب : فد يوم سيد صاعدين بالمصلحة وصعد حسون .. هو والجلب مالته وولف دوك .. وكص بطاقة للجلب والناس خافت من الجلب وكاموا يدردمون .. الجابي كله حسون أخذ الجلب وأنزل .. حسون زعل وكال للجابي ..عمي الجلب أحسن منهم كلهم
علاوي : دشوف شلون جابي هذا ورا ماعلس فلوس البطاقة يريد ينزله
سيد نعمان : أي عنده أفكار عجيبة غريبة .. طلعوه بالتلفزيون مرة وسأله المذيع ليش هيج تلبس جاوبه حسون وكال بابا الإنسان لازم عنده حرية شيلبس شياكل .. بس كون مايأذي أحد .. وحيل ماقبل على سالفة الشباب من يتحارشون بالبنات .. كال عيب مايصير ومو لايقة ولا من عوايدنا
علاوي : عمي هيه وين البنات .. شو الكل شرطة نوري سعيد
سيد رجب : أي هو واهسة هماتين بالسينما .. والأفلام الأجنبية .. يكفر يشوف فلم ثاني يوم يقلد الممثلين
سيد نعمان : الصيف الفات سافر بره ويكول بالخارج الأجانب تعجبوا شلون عراقي يلبس مثلهم وأضرب بعد
علاوي : شنو قابل يروحلهم بالصاية ومتحزم بجنادة
سيد رجب : شنوعلاوي قابل المسكين من ثوار ثورة العشرين تحزمه بجنادة .. أي سيد نعمان نرجع لسالفتنا .. هذا المكموع علاوي بس ينطنط .. هو حسون عنده تكرم حذاء عجيب غريب اله بوز من كدام ويسميه جم جم
سيد نعمان : لا كلها كوم سيد ومن راح لدار المعلمين كوم .. أول ماكعد بالحديقة طلب من البوي جاي وحليب وراد كصبة يشرب بيها كول البوي بقى صافن وراها راح جاب الكصبة وأول ماحطها حسون بالجاي جان تموع والناس التمت على الميز مالته ويضحكون .. فلم كل سوالفه
سيد رجب : أي سوالف سيد نعمان .. أدزلك على حامض لاخ
سيد نعمان : لا بروح أبوك كافي شربت القوري كله .. أريد أمشي لأهلي
كويظم : عمي .. عمي سيد رجب أعزل الكهوة
سيد رجب : ليش ابني كويظم تعزل الكهوة .. شنو أحد مات .. هاي شبيك
كويظم : مو عمي علاوي تخبل وآني أكول إنسد الكهوة حدادا
سيد رجب : ولك شجاي تخربط شنو علاوي تخبل .. شنو حدادا .. هسة جان كاعد بنصنا
كويظم : د إطلع عمي برة وشوف زعاطيط الدربونة كلها تركض وراه
سيد رجب : كوم سيد نعمان .. كوم وياي بباب الكهوة نشوف شنو القضية
كويظم : شفت عمي علاوي تخبل .. لابس بابوج أمه وياها جواريب فستقي .. وقميص برتقالي مزركش يمكن بايك دشداشة من اللي أمه تخيطهم .. صخام بعينك علاوي إذا صدك .. شوف عمي حاط شفقه على راسه كلها قش وريش طيور .وضروك تارسة الشفقه .. عمي هذا كايد بزونة سليمة أم الباجلة وملبسها باينباغ ..عمي أسد الكهوة
سيد رجب : حسنات سيد نعمان .. آني صوجي .. هذا ولايتوب.. شوف شلون مسرحية سواها بالدربونة
سيد نعمان : أودعناكم سيدنا .. والله يعينك على علاوي ..عمي أنت إلك الجنة
caricature@asc-corp.org
