بيت أو النبكة
تحت موس الأيام .. حلقات فكاهية يتعانق فيها القلم مع الريشة ليقدما لكم مشاهد كوميدية ممتعة، مستوحاة من مسلسل تحت موس الحلاق الذي أسر العراقيين لأجيال لنكهته الشعبية العفوية، والطريفة، والمميزة، التي قدمها عمالقة الفن العراقي سليم البصري، حمودي الحارثي، خليل الرفاعي، راسم الجميلي، وآخرون، تقدمها لكم ، فكرةً، وكتابةً، ورسماً، الفنانة المبدعة إيمان البستاني،التي تصف هذا العمل بقولها ( أنه محاولة لربط الحاضر عبر تنقلاته بمفردات مرت على الذاكرة، حزينة كانت أم سعيدة، أأمل أن ينال رضاكم، وإن أي تشابه بين حوادث وشخصيات المسلسل محض صدفة وليس الغرض منه الإساءة لأي شخص وإنما لغرض الفكاهة البريئة )، فيما رسم الشخصية الكاريكاتيرية لبطل الحلقات (علاوي) الفنان المتألق جبار الجنابي.
تحت موس الأيام .. كوميديا باللهجة العراقية، تقدم لكم معلومات عن شخصيات وأحداث وأماكن من العراق بنكهة التراث، وهو عمل جديد بفكرته وأسلوبه، في إطار ( الأدب الشعبي ) فتابعوه .
مشرقيات
فكرة وكتابة ورسم
إيمان البستاني
الحلقة التاسعة
علاوي وين جنت كل النهار .. آني وأمك نشف ريكَنا نشف نصيح عليك .. لا خلينا سطح .. لا جوارين .. يعني شوكت تبطل سوالفك .. كميلة استلمي
كميلة أم علاوي : كاعدة الف كبة وماأكدر أتزحزح .. تعال هنا يول وأحجيلي وين جنت غاط .. وشدعوة هلكد عطشان خلصت التنكة
علاوي : يمة لو أحجيلكم على اللي صار تتخبلون
عليش أحنا مخابيل بالفطرة .. شعندك علوم ناقصة
علاوي : خالة سامعة أبيت أبو النبكة
لا والله خالة .. شو هيه كل البيوت أكثرها بيها نبكة .. ليش
علاوي : لا خالة هذا وحد قصته قصة .. يكَولون جان البيت مال أخوة أثنين وأمهم .. الأخوة عشكو بنت عمهم وتعاركوا عليها .. فد يوم شتا تمطر واحد ضرب اللاخ بسجين مطبخ ودمهم شربته النبكة .. أمهم تخبلت عليهم .. اثنينهم ماتو .. والبيت صار مسكون كله جن وعفاريت .. ولا أكبر شارب يكدر يفوت البيت
علاوي مضروب الجلوة .. الدنيا مغرب .. أكو داعي لهالسالفة مو ولك أمك تخاف من طاري الجن
علاوي : إي خالة الناس كامت تخاف من البيت كله صوت عياط وضحك ودنابك وحتى النبكة محد يتقرب منها واللي ياكل منها يصير هو واللي شنو اسمه ولد عم
كل شي ما افتهمت منو ابن عم منو
علاوي : يعني خالة اللي ياكل منها يصير غبي حطيطة .. والجهال ياهو اللي يرسب بالمدرسة يكول لأهله ماكل من النبكة حتى لايبسطوه
بس لايول ماكل منها .. وصار اللي صار
علاوي : خالة أكو واحد شيوعي اسمه حمزة .. الشرطة تركض وراه من ورا شغلة المناشير اللي يوزعها .. إنهزم هو يركض والشرطة تركض وراه تالي نط من السياج وطب بيت أبو النبكة
كميلة أم علاوي : أيديه ولاتاخذ شغل .. أكول يمة علاوي شنو شيوعي
علاوي : يمة يعني الوزير والزبال سوا ماكو فرق
كميلة أم علاوي : هاي شلون يعني الوزير يشتغل الصبح وزير .. و ورا الظهر زبال لو شلون
علاوي : آني شمدريني هما يكَولون هيج .. حمزة نط من السياج وصار بنص البيت المسكون .. والشرطة بقوا برة يصيحون على حمزة .. اطلع سلم نفسك لو نرمي ها
كميلة أم علاوي : علاوي كوم وليدي اعلك الفانوس واللوكس الدنيا ظلمت .. وسالفتك يبين مثل وجهك
علاوي : دقيقة يمة .. خلي أكمل السالفة .. هو حمزة طب البيت والشرطة برا وشكو جهال وزلم ونسوان بمنطقة سبع قصور كلها واكفة وتباوع .. والشرطة بره مسلحين والكلبجات بيدهم تستطج.. أكلج يمة فلم ولا صاير
إي ولك مو افتهمنا حمزة مالتك طب البيت والشرطة برا وبعدين .. فضنا ورانا مية شغلة لحد هسة ماطبكت الهدوم بعدها مشرورة بالسطح
علاوي : هناك وأجى الضابط مالتهم مصلاوي كصير واصلع وسمين كرشه لخشمه وصوته رفيع مال نسوان كام يصيح على الشرطة والناس تضحك
إدخلوا علينو، إبسطونو .. وقتلونو .. وِفْجِخونو .. وجغجغونو .. وبهذلونو .. وِنعَلو امو وأبونو
والجهال بالشارع يكمزون مثل الشوادي ويغنون
حمزة كمز كمزة ضرب طوب كتل خمسة
إي دفضنا .. بلا أغاني وأناشيد ومؤثرات صوتية
علاوي : إي غير أحجيلكم شصار .. هناك والضابط كال للعريف مهاوش كل شرطي يطب البيت ويلزم حمزة ياخذ ١٠٠ فلس
حيل شكبرها شكدها .. مكافآة تفك المصلوب .. وبعدين
علاوي : الدنيا بدت تظلم .. وكالو هسة يا من الخوف .. يا من الجوع يبطل حمزة ويطلع .. الشرطة وأهل المحلة فرشوا دواشك كدام البيت واشتغلت رحمة الله .. صواني الجاي والبقصم .. ركَي بارد مشيف .. سميط .. حتى أبو الحمص حط جدرين بالعربانة وكف يبيع ويصيح بعلو صوته : لبلبي .. بيع أمك وأشتري .. وكاتب على العربانة محروسة سبع الدجيل .. وأجى أبو العمبة يصيح : عمبة أم الشريس
إي وشنو كاتب عالعربانة .. لاتسرع بابا نحن في إنتظارك .. ولك دفضنا شنو صارت قصة عنتر
علاوي : إي خالة وين وصلنا .. حمزة جوه بالبيت والشرطة برا مجودرة .. هناك وجان يسمعون صوت
كميلة أم علاوي : يمة سور سليمان .. أعوذ بك من شر وسواس خناس .. هذا ياصوت .. دادة أنعل أبو الكَبة خلي أجي أكعد يمج
علاوي : هناك والدنيا سنطة .. طلع صوت حمزة يضحك ويصيح والعالم ترد وراه
أنعل أبو الحكومة .. آمين
وبجاه الله وسماعين .. آمين
موت الكرف شرطتنه .. آمين
نكسوا والله عُكلنه .. آمين
إي والضابط أبو صوت النسوان عاف حمزة يسب ويشتم
علاوي : خالة شنو الضابط صار عصبي غدا دم .. والنوب هو كصير .. كام يصيح عالشرطة : كليب ولاد الكليب ... ينعل أبوكِم وأبو الخَلَفكِم
هاي وبقيتو ناس تسب ناس والتالي .. دفضنا
علاوي : إي خالة وجان يطلع الجني
يمة كميلة .. سودة علية .. هاي وكعت أمك .. ناوشني طاسة الماي .. كميلة جاوبيني ..شوف شلون زركت المرة
علاوي : يمة ترا ماكو جني كلها جذب
ولك شكد غمزتلك أريدك تسكت وأنت أبد دودودو .. مو تدري أمك خوافة .. كوم جيبلي الربل آخذها للمستشفى .. بس والعظيم الله لا أدبغ جلدك علاوي .. حتى أمك ماخلصت من سوالفك .. الله يسود وجهك علاوي كلما تطلع شمس وتغيب.
caricature@asc-corp.org
